1ព្រះអម្ចាស់ជាពន្លឺ និងជាព្រះសង្គ្រោះខ្ញុំ តើខ្ញុំត្រូវខ្លាចនរណាទៀត? ព្រះអម្ចាស់ជាទីជម្រករបស់ជីវិតខ្ញុំ តើខ្ញុំត្រូវតក់ស្លុតឬ?
2ពេលពួកបច្ចាមិត្ត និងខ្មាំងសត្រូវរបស់ខ្ញុំនាំគ្នាមកជិតខ្ញុំ ដើម្បីស៊ីសាច់ខ្ញុំ នោះគេនឹងជំពប់ដួល។
3ទោះបើមានពលទ័ពមកឡោមព័ទ្ធខ្ញុំ ក៏ចិត្តខ្ញុំមិនភ័យខ្លាចឡើយ ទោះបើមានចម្បាំងកើតឡើងទាស់នឹងខ្ញុំ ក៏ខ្ញុំនៅតែមានទំនុកចិត្តជានិច្ច។
4ខ្ញុំបានសូមសេចក្ដីតែមួយពីព្រះអម្ចាស់ ហើយនឹងស្វែងរកសេចក្ដីនោះឯង គឺឲ្យខ្ញុំបាននៅក្នុងដំណាក់របស់ព្រះអម្ចាស់ រាល់តែថ្ងៃអស់មួយជីវិតរបស់ខ្ញុំ ដើម្បីរំពឹងមើលសោភ័ណភាពរបស់ព្រះអម្ចាស់ ហើយពិនិត្យពិចារណានៅក្នុង ព្រះវិហាររបស់ព្រះអង្គ។
5ដ្បិត នៅក្នុងថ្ងៃដែលមានទុក្ខលំបាក ព្រះជាម្ចាស់នឹងបិតបាំងទូលបង្គំនៅក្រោមម្លប់របស់ព្រះអង្គ បិតបាំងដោយព្រះពន្លារបស់ព្រះអង្គ។ ព្រះអង្គនឹងលើកខ្ញុំដាក់លើថ្មដា។
6ដ្បិត ខ្ញុំបានងើបក្បាលឡើង ខ្ពស់ជាងខ្មាំងសត្រូវដែលនៅជុំវិញខ្ញុំ ហើយខ្ញុំនឹងថ្វាយយញ្ញបូជា នៅក្នុងព្រះពន្លារបស់ព្រះអង្គ ទាំងស្រែកដោយអំណរ ខ្ញុំនឹងច្រៀង ខ្ញុំនឹងលើកទំនុកថ្វាយព្រះអម្ចាស់!
7ឱព្រះអម្ចាស់អើយ! សូមសណ្ដាប់ពេលទូលបង្គំទូលរកព្រះអង្គ សូមមេត្តាដល់ទូលបង្គំ និងឆ្លើយតបមកទូលបង្គំផង!
8ឱព្រះអម្ចាស់អើយ! ចិត្តទូលបង្គំនឹកដល់ព្រះបន្ទូលរបស់ព្រះអង្គថា «ចូរស្វែងព្រះភ័ក្រ្តរបស់ព្រះអង្គ!» ទូលបង្គំស្វែងរកព្រះភ័ក្ត្រព្រះអង្គហើយ។
9សូមកុំបាំងព្រះភ័ក្រ្តព្រះអង្គពីទូលបង្គំឡើយ សូមកុំបង្វែរសេចក្តីកំហឹងរបស់ព្រះអង្គមកលើអ្នកបម្រើរបស់ព្រះអង្គឡើយ! ព្រះអង្គជាអ្នកជួយទូលបង្គំ ព្រះជាម្ចាស់នៃសេចក្តី សង្គ្រោះទូលបង្គំអើយ សូមកុំផាត់ទូលបង្គំចេញសូមកុំបោះបង់ចោលទូលបង្គំឡើយ!
10បើទោះបីឪពុកម្តាយ បានបោះបង់ចោលទូលបង្គំ ព្រះអម្ចាស់នឹងទទួលទូលបង្គំទុក។
11ឱព្រះអម្ចាស់អើយ! សូមបង្រៀនទូលបង្គំឲ្យស្គាល់ផ្លូវរបស់ព្រះអង្គ សូមនាំទូលបង្គំទៅតាមផ្លូវរាបស្មើ ដោយព្រោះតែខ្មាំងសត្រូវរបស់ទូលបង្គំ។
12សូមកុំប្រគល់ទូលបង្គំទៅតាមបំណងចិត្ត បច្ចាមិត្តរបស់ទូលបង្គំឡើយ ដ្បិតមានស្មរបន្ទាល់ក្លែងក្លាយ បានលើកគ្នាទាស់នឹងទូលបង្គំ ពីព្រោះដង្ហើមពួកគេចេញដោយពាក្យសាហាវ!
13តើនឹងមានអ្វីកើតឡើងដល់ទូលបង្គំ បើទូលបង្គំមិនជឿថាព្រះអម្ចាស់ពេញដោយសេចក្ដីសប្បុរស នៅក្នុងទឹកដីរបស់មនុស្សកំពុងរស់នៅ?
14ចូររង់ចាំចំពោះព្រះអម្ចាស់ ចូរមានកម្លាំង ហើយមានចិត្តក្លាហានឡើង ចូររង់ចាំព្រះអម្ចាស់ចុះ!