1មិនមែនយើងខ្ញុំទេ ឱព្រះអម្ចាស់អើយ មិនមែនយើងខ្ញុំទេ តែព្រះនាមព្រះអង្គវិញ ដែលទទួលការលើកតម្កើង ដោយយល់ដល់ព្រះហឫទ័យសប្បុរស និងសេចក្ដីស្មោះត្រង់របស់ព្រះអង្គ។
2ហេតុអ្វីបានជាជនជាតិនានាពោលថា «តើព្រះរបស់ពួកគេនៅឯណា?»
3ព្រះជាម្ចាស់នៃយើងខ្ញុំព្រះអង្គគង់នៅស្ថានសួគ៌ ព្រះអង្គធ្វើគ្រប់កិច្ចការ ដែលព្រះអង្គសព្វព្រះហឫទ័យ។
4ព្រះរបស់គេសុទ្ធតែជារូបសំណាក ធ្វើពីប្រាក់ និងមាស ជាស្នាដៃដែលមនុស្សធ្វើ។
5រូបទាំងនោះមានមាត់ តែមិនចេះនិយាយ មានភ្នែក តែមើលមិនឃើញ
6មានត្រចៀក តែស្តាប់មិនឮ មានច្រមុះ តែធុំក្លិនមិនបាន។
7មានដៃ តែចាប់កាន់មិនបាន មានជើង តែមិនចេះដើរ រូបទាំងនោះមិនចេះបញ្ចេញសំឡេង តាមបំពង់កឡើយ។
8ពួកអ្នកដែលធ្វើ អស់អ្នកដែលទុកចិត្ត នឹងរូបទាំងនោះ នឹងបានដូចជារូបទាំងនោះដែរ។
9អុីស្រាអែលអើយ ចូរទុកចិត្តដល់ព្រះអម្ចាស់ ព្រះអង្គជាជំនួយ និងជាខែលរបស់អ្នក។
10ពួកវង្សអើរ៉ុនអើយ ចូរទុកចិត្តដល់ព្រះអម្ចាស់ ព្រះអង្គជាជំនួយ និងជាខែលរបស់អ្នក។
11អ្នករាល់គ្នាដែលគោរពដល់ព្រះអម្ចាស់អើយ ចូរទុកចិត្តដល់ព្រះអម្ចាស់ ព្រះអង្គជាជំនួយ និងជាខែលរបស់អ្នក។
12ព្រះអម្ចាស់បាននឹកចាំពីយើង ព្រះអង្គនឹងប្រទានពរយើងព្រះអង្គនឹងប្រទានពរពួកវង្សអុីស្រាអែល ព្រះអង្គនឹងប្រទានពរពួកវង្សអើរ៉ុន។
13ព្រះអង្គនឹងប្រទានពរអស់អ្នក ដែលកោតខ្លាចព្រះអម្ចាស់ ទាំងអ្នកតូច ទាំងអ្នកធំ។
14សូមព្រះអម្ចាស់ប្រទានពរ ឲ្យអ្នករាល់គ្នាបានចម្រើនឡើង គឺទាំងអ្នករាល់គ្នា ទាំងកូនចៅរបស់អ្នករាល់គ្នា។
15សូមឲ្យអ្នកបានពរពីព្រះអម្ចាស់ ជាព្រះដែលបានបង្កើតផ្ទៃមេឃ និងផែនដី។
16ស្ថានសួគ៌ គឺជារបស់ព្រះអម្ចាស់ ចំណែកផែនដីវិញ ព្រះអង្គបានប្រទានដល់មនុស្សជាតិ។
17មនុស្សស្លាប់មិនចេះសរសើរតម្កើង ព្រះអម្ចាស់ទេ ហើយអ្នកណាដែលចុះទៅស្ថានស្ងាត់ឈឹង ក៏មិនចេះសរសើរតម្កើងព្រះអង្គដែរ។
18ប៉ុន្តែ យើងវិញ នឹងថ្វាយព្រះពរព្រះអម្ចាស់ ចាប់តាំងពីឥឡូវនេះ រហូតអស់កល្ប។ សរសើរដល់ព្រះអម្ចាស់។