1ព្រះអម្ចាស់អើយ សូមព្រះអង្គស្តាប់ ហើយឆ្លើយតបមកទូលបង្គំផង ដ្បិតទូលបង្គំទាល់ក្រ ហើយខ្វះខាត។
2សូមរក្សាកាពារទូលបង្គំ ដ្បិតទូលបង្គំស្មោះត្រង់ ព្រះជាម្ចាស់នៃទូលបង្គំ សូមសង្គ្រោះអ្នកបម្រើព្រះអង្គ ដែលទុកចិត្តដល់ព្រះអង្គផង។
3ព្រះអម្ចាស់អើយ សូមមេត្តាដល់ទូលបង្គំ ដ្បិតទូលបង្គំបានស្រែករកព្រះអង្គរាល់ថ្ងៃ។
4សូមបណ្ដាលឲ្យព្រលឹងអ្នកបម្រើព្រះអង្គ រីករាយឡើង ដ្បិត ព្រះអម្ចាស់អើយ ទូលបង្គំទូលទៅរកព្រះអង្គ។
5ដ្បិត ព្រះអម្ចាស់អើយ ព្រះអង្គល្អ ហើយតែងតែអត់ទោស ព្រះអង្គបង្ហាញក្តីមេត្តា ចំពោះអស់អ្នកណាដែលស្រែករកព្រះអង្គ។
6ព្រះអម្ចាស់ សូមស្ដាប់ពាក្យអធិស្ឋានរបស់ទូលបង្គំ សូមស្តាប់សម្រែកទូលអង្វររបស់ទូលបង្គំផង។
7នៅថ្ងៃទូលបង្គំមានសេចក្ដីវេទនា ទូលបង្គំបានស្រែករកព្រះអង្គ ដ្បិតព្រះអង្គឆ្លើយតបមកទូលបង្គំ។
8ព្រះអម្ចាស់អើយ ក្នុងចំណោមព្រះផ្សេងៗគ្មានព្រះណាដូចព្រះអង្គទេ។ គ្មានព្រះណាធ្វើការអស្ចារ្យដូចព្រះអង្គឡើយ។
9ព្រះអម្ចាស់អើយ អស់ទាំងជនជាតិដែលព្រះអង្គបានបង្កើត នឹងនាំគ្នាមកក្រាបថ្វាយបង្គំព្រះអង្គ ហើយពួកគេនឹងលើកតម្កើងព្រះនាមព្រះអង្គ។
10ដ្បិតព្រះអង្គធំ ហើយធ្វើការយ៉ាងអស្ចារ្យ មានតែព្រះអង្គប៉ុណ្ណោះដែលជាព្រះជាម្ចាស់។
11ព្រះអម្ចាស់អើយ សូមបង្រៀនទូលបង្គំឲ្យស្គាល់ផ្លូវរបស់ព្រះអង្គ។ ទូលបង្គំនឹងដើរក្នុងសេចក្ដីពិតរបស់ព្រះអង្គ។ សូមបង្រួមចិត្តទូលបង្គំ ឲ្យកោតខ្លាចព្រះនាមព្រះអង្គ។
12ព្រះអម្ចាស់ ជាព្រះជាម្ចាស់នៃទូលបង្គំ ទូលបង្គំនឹងអរព្រះគុណព្រះអង្គយ៉ាងអស់ពីចិត្ត ហើយនឹងលើកតម្កើងព្រះនាមព្រះអង្គតទៅ។
13ដ្បិតព្រះហឫទ័យសប្បុរសរបស់ព្រះអង្គ មកដល់ទូលបង្គំ ដ៏អស្ចារ្យណាស់ ព្រះអង្គបានរំដោះព្រលឹងទូលបង្គំ ឲ្យរួចផុតពីស្ថានឃុំព្រលឹងមនុស្សស្លាប់។
14ព្រះជាម្ចាស់អើយ មនុស្សព្រហើនបានលើកគ្នា ទាស់នឹងទូលបង្គំហើយ។ មនុស្សច្រឡោតមួយក្រុមចង់ដកជីវិតទូលបង្គំ។ ពួកគេមិនបានគោរពព្រះអង្គនោះទេ។
15ប៉ុន្ដែ ព្រះអម្ចាស់អើយ ព្រះអង្គជាព្រះប្រកបដោយព្រះហឫទ័យមេត្តា និងប្រណីសន្ដោស ព្រះអង្គយឺតនឹងខ្ញាល់ ហើយមានព្រះហឫទ័យសប្បុរស និងព្រះហឫទ័យស្មោះត្រង់។
16សូមបែរមកទូលបង្គំ ហើយប្រណីសន្ដោសទូលបង្គំ សូមប្រទានកម្លាំងរបស់ព្រះអង្គ ដល់អ្នកបម្រើព្រះអង្គ សូមសង្គ្រោះកូនរបស់ស្ត្រី ជាអ្នកបម្រើរបស់ព្រះអង្គផង។
17សូមសម្ដែងទីសម្គាល់មួយ ពីសេចក្ដីល្អដល់ទូលបង្គំ ដើម្បីឲ្យអស់អ្នកដែលស្អប់ទូលបង្គំបានឃើញ ហើយមានសេចក្ដីខ្មាស ដោយសារតែព្រះអង្គ ព្រះអម្ចាស់អើយ ព្រះអង្គបានជួយទូលបង្គំ ហើយបានកម្សាន្តចិត្តទូលបង្គំ។