1ចូរស្រែកច្រៀងថ្វាយព្រះជាម្ចាស់ ដែលជាកម្លាំងរបស់យើង ចូរស្រែកដោយអំណរ ថ្វាយព្រះរបស់លោកយ៉ាកុប។
2ចូរច្រៀងចម្រៀង ហើយចាប់ស៊ុងយ៉ាងពីរោះ និងដេញពិណផង។
3ចូរផ្លុំត្រែនៅពេលចាប់ផ្ដើមខែខ្នើត នៅពេលខែពេញបូណ៌មី ជាថ្ងៃផ្តើមបុណ្យរបស់យើង។
4ដ្បិតនេះជាច្បាប់សម្រាប់អុីស្រាអែល ជាវិន័យរបស់ព្រះនៃយ៉ាកុប។
5ព្រះអង្គតាំងច្បាប់នោះ ទុកជាទីបន្ទាល់នៅក្នុងពួកយ៉ូសែប នៅពេលព្រះអង្គចេញទៅ វាយប្រហារទឹកដីអេស៊ីប ខ្ញុំបានឮសំឡេងមួយដែលខ្ញុំមិនស្គាល់ថា៖
6«យើងបានដោះបន្ទុកចេញពីស្មារបស់អ្នក ហើយក៏យកកញ្ច្រែងចេញពីដៃរបស់អ្នកដែរ។
7នៅក្នុងគ្រាមានទុក្ខវេទនា អ្នកបានអំពាវនាវ ហើយយើងបានជួយអ្នក យើងបានឆ្លើយតបដល់អ្នកពីទីសម្ងាត់នៃផ្គរ។ យើងបានល្បងលអ្នកនៅទឹកមេរីបា។ សម្រាក
8ប្រជារាស្ត្ររបស់យើងអើយ! ចូរស្តាប់ ដ្បិត យើងបានដាស់តឿនអ្នក អុីស្រាអែលអើយ ប្រសិនបើអ្នកគ្រាន់តែស្តាប់តាមយើង!
9មិនត្រូវឲ្យមានព្រះដទៃណា នៅក្នុងចំណោមអ្នកឡើយក៏មិនត្រូវក្រាបថ្វាយបង្គំព្រះ ជនជាតិដទៃណាដែរ។
10យើងជាព្រះអម្ចាស់ជាព្រះរបស់អ្នក ដែលបាននាំអ្នកចេញពីទឹកសីអេស៊ីប ចូរហាមាត់អ្នកឲ្យធំ នោះយើងនឹងបំពេញដល់អ្នក។
11ប៉ុន្តែ រាស្ត្ររបស់យើង មិនបានស្តាប់តាមពាក្យយើង អុីស្រាអែលមិនព្រមស្តាប់បង្កាប់យើងទេ។
12ដូច្នេះ យើងក៏បណ្ដោយឲ្យគេ ទៅតាមចិត្តរឹងចចេសរបស់គេ ឲ្យគេប្រព្រឹត្តតាមគំនិតរបស់ខ្លួនគេ។
13ឱប្រសិនបើប្រជារាស្ត្ររបស់យើង ព្រមស្តាប់តាមយើង ឱប្រសិនបើអុីស្រាអែល ព្រមដើរតាមផ្លូវរបស់យើងនោះ។
14នោះយើងនឹងបង្ក្រាបខ្មាំងសត្រូវរបស់គេភ្លាម ហើយយើងនឹងបង្វែរដៃ ទៅទាស់នឹងបច្ចាមិត្តរបស់គេមិនខាន។
15សូមឲ្យអស់អ្នកដែលស្អប់ព្រះអម្ចាស់ នឹងក្រាបនៅចំពោះព្រះអង្គ! សូមឲ្យវាសនាអាក្រក់របស់គេ នៅជាប់នឹងគេរហូតទៅ។
16ប៉ុន្ដែ យើងនឹងចិញ្ចឹមអុីស្រាអែល ដោយស្រូវសាលីល្អបំផុតហើយនឹងចម្អែតអ្នកដោយទឹកឃ្មុំពីថ្មដា»។